南柯梦(六)

    今年冬来的雨水诚捷，妹仔都怀疑即站仔是毋是已经春来啰。手囊（long5）、雨衫、羽绒服、冻鞋，一身起来诚臭笨。
    远远看着工艺厂门口一垺侬。死啰，佫酵啰！近来，一个绿白校服的查某囡仔，绞一个童发头，在在坐咧电动车了了仔拍手机，车正手爿的涂骹倒一只骹踏车敽一个头罩甲看袂出是丈夫（ta-poo）抑查某的老侬，扫涂骹的阿北仔卫生工跍咧，共老侬推太阳pian。赶赶紧紧卜去读册、上班的大侬囡仔也但小驻骹看一下就行动。等妹仔翻头佫位即搭过去的时阵，已经无看见半身侬影啰。就若亲像即位头先仔根本无发生啥乜代志仝款。
天主教堂粉红色的半圆厝顶的十字架，佮对过去泉州酒店金色的半圆厝顶，今仔日无迄tshinn5甲袂裭目的日头啰。
“亲姆啊，汝来啰乎！来哦来哦，入来坐坐哦！”
“母仔！小弟无来？”
“恁小弟着较晏下班咧则会来。我先tshua7强仔佮妹仔来。”
“哦～”“母仔，等咧卜刣猪，我来去发落一下，汝敽阮母仔坐一下乎。”
“去哦去哦～”
“哎，若无玉仔拙勥，我哪有法啊。卢仔结婚佫挂入厝，拙久伊家一个摸到有暝无日。昨暝供天公，玉仔无闲仔到际犹无困……”两个细粒子的亲姆手牵咧坐咧厅里的椅条咧化仙。“嬷仔，哼……”妹仔徛咧厅头的案前，手lerh一蕊白色的仙pok8花。“乎，亲姆啊，来来来，天光则叫大汉查某去钟楼买的，来哦，规圈的玉兰花（女畜）（thiak）哦！”
“卜刣猪啰！卜刣猪啰！”