笑

    毋知從啥乜時陣開始，發現本在誠愛笑的家已規日面臭臭、橫橫。一日仔，烏白枋看著姊妹伴偷翕的siong6，迄蕊目睭誠惡、誠使狠。本在毋是規日笑文文的？是老囉無愛佫笑囉？毋久笑佮老有啥關係啊？老嘛會做笑得！無歡喜？嘛無！
     是毋是佫斡倒去佇團裏迄站的款？迄huai5丈夫（ta-poo）同學所說的：規日一支解放軍面！抑是親像吉仔說的：規日靜tshainn-tshainn、雕雕坐咧頂鋪，毋知咧干代志！
    是咧想代志？
    是咧抄劇本、曲本？
    抑是咧練眼神？
    抑是，咧想腳(kioh)？
    勿會記得囉。
 
    頂鋪邊頭有一個細細的窗仔，一扇柴框玻璃脫窗。相出去是一個大墓。妹仔逐暗都掠迄個墓金金相。 隨開班迄年熱儂，堤外淹大水，菜洲洪堤外水淹到戲台骹，出入著劃柴枋。 迄暗團長位女宿舍開會。妹仔還（huan5）坐咧頂鋪。圖長敽同學咧討論啥，妹仔無聽半句，戇戇看窗仔外口。墓乞淹仔偆無一絲仔，月娘誠圓、誠大、誠黃。月光矅仔墓邊頭迄垺菅芒誠白誠媠。水面黃晃黃晃，無斟酌看親像一個霸灰球場。
    妹仔頭殼搖搖咧醒眠。
    番薯溝邊頭迄三間洗身間的蜈蜞毋知乞水浸死未？huai5蜈蜞誠大只哦，逐只烏烏肥肥。有時仔妹仔會共亻因看做是臭焦的抑是浸臭水變色的龍眼樹箬。
    “妹仔，落來哦！排戲囉！”
    “啊？！”
    跳落床，妹仔將水鞋囊落去。咦？骹水腫？勿會得落？即骹呢？好好啊！ 毋著啊！佫軟軟怪怪啊！ 妹仔將水鞋倒吊反，鞋喙位塗骹敲敲咧。“呱……呱……”一只水雞位水鞋裏tshiok8出來！“啊……”妹仔將水鞋hinn3仔偌遠，激仔毋成聲調。
    規內同學笑仔倒咧床頂膏……