《做鬼嘛欲來共汝拖去》

    逐年生日的時陣就會想著老母。想著老母，就想著阮老引嬤！怎安爾說啊？因為我就想著我細漢的時陣，阮老引嬤罵阮老母的迄句話：我做鬼嘛欲來共汝拖去！亻因是有偌大冤仇？嘛無！
    誠實，迄年，老引嬤做忌迄日，我日時就膽膽仔咧！下班了，我無倒去厝，直接去看阮老母！問伊咧酵？敽伊笑。伊計無反應，就是直直看。咧看我抑是咧看啥我就毋知囉。問阿兄看老母今仔障仔？阿兄說：還安爾啊！
    七點外，看無酵代志，我就敽老母相辭。老母還是無做聲，還是無表無情掠我金金相。
    行過骹，則到半路爾，手機從袋仔提出來看時間，煞看著阿兄拍來的四個未接電話！
    知空囉！我趕緊斡倒返，乃拍電話度阿兄。老母無囉！
    我看時間，八點外！
    入門，玉花說：恁兄佮恁孫仔則去樓頂洗頭爾，我共恁母換藥了，捾糞埽去倒斡來，伊就無囉！我叫恁兄的時陣，恁兄頭則洗一半爾！
    誠實是老引嬤？汝等到阮無佇咧囉，誠實來共阮老母拖去？
    阮妗定說阮老母田螺骹薑母手，做鬼都搶無金銀。阮嬤phinn3乞阮母！阮母古意，勿會曉敽儂冤家。阮細漢的時陣，伊定定度阮老引嬤罵仔覕咧房裏吼。
    共老母點香的時陣我細細說：老母啊，汝著較赤鉗咧，若無會食無！