我伫泉州拄着汝

原著：黄小马
編剧：黄柏清 殷斯麒
口白：林聪云
《骹踏车》演唱者：王识贤
作词、作曲：刘清辉
转写：痟婆仔
视频网址：我伫泉州拄着汝
（口白）
若是我伫泉州拄着汝
汝随随佮汝的男朋友分手
我犹未准备好开始下一段感情
汝从中山北路南下
我继续着中山南路的北漂
钟楼嘀嘀嗒嗒霆三声
日头度时针剪做四十五度角
燕支巷口的春雨随随停
规涂骹失落着茉莉的伤口
若是我伫泉州拄着汝
我牵汝去美食街水门国仔面线糊食点心
汝说汝无爱芹菜的味素
我叫伊胡椒粉加糁淡薄
汝说面干糊内面的蟹肉好食
我说其实掺醋肉佮大肠也袂歹
若是我伫泉州拄着汝
我倩一隻三轮车叫师傅载咱去开元寺
汝说汝无信佛 我说汝着信我
暗晡四点外钟寺里香客野少
我共汝说即搭的佛祖野圣
汝说汝想卜去看送子观音
我伫咧大殿头前抱汝辗一圈
迄个敲钟的和尚叹着气说男女授受不亲
若是我伫泉州拄着汝
我借着一隻骹踏车载汝后城去辗
暗晡的日头斜照伫咧清真寺的墙咧
关帝庙的香炉点着香
迄条度车轮辗着的石板路伫咧余晖下唱尽了温陵的繁华与变迁
汝伫咧渠仔边的第三枞柳树迄搭轻轻仔揽着我
若是我伫泉州拄着汝
汝说，汝袂做超过十点倒去得
我会共汝送到恁厝内楼骹
看汝足百起去
则共汝发短信
顶面写着：我想汝
然后汝回：我想汝
（《骹踏车》歌词）
踅来踅去骑阮的骹踏车
等待汝下课陪汝每工做阵行
轻轻心内话伴着车辗骹踏声
阮的希望拢寄伫遐
树顶的鸟仔不时来偷听
听咱谈恋爱快乐约会的心晟
阮的纯情梦为汝每工囥伫遮
欢欢喜喜陪汝做阵行
踅啊踅啊踅，踅着咱的爱
踏啊踏啊踏，踏着青春佮期待
甜蜜的滋味掺着咱的爱
阮会永远囥在心内