泉州囡仔歌

转写自：林华东 先生 主编的《泉州歌谣》
有声版囡仔歌《年兜年尾头》
《年兜年尾头》
年兜年尾头，
世事真正厚。
炊糕炊粿炊菜包，
做衫做裤做年兜。
老伙计，伫外口，
死囝（gin2）仔，四界走，
叫甲无一个通对头，
也卜顾大鼎，
也卜顾铁斗，
炊糕无顺火，
规床计无笑。
［注解］①厚：多。②老伙计：翁的戏称。③死囝仔：呆膏（gai5-ko）的囡仔。④对头：帮手。⑤规床：规个笼床（的糕）⑥笑：碗糕炊熟了后，面裂开若开花的款。
有声版囡仔歌《侬插花 汝插草》
《侬插花 汝插草》
侬插花，汝插草；
侬刣猪，汝刣狗；
侬咧笑，汝咧吼；
侬睏眠床，汝睏踏斗。
［注解］①踏斗：旧式眠床头前的踏垫，形状新像低长椅。
有声版囡仔歌《说阿妗》
《说阿妗》
外公跷骹咧烧薰，
外妈开门等外甥；
阿舅上（tsiunn6）街去买菜，
阿妗嫌阮捷捷来。
阮是为着外公外妈在（tsai6），
若无阮三年五年都毋来。